ياعرب اقروا الكراريس

إن كُنتو نسيتو إللّى جرا
هاتو الجرايد تنقرا
نرجع سوا بالذاكره
أول صفحه بخط كبير
صورالدمار والمجزره
فاكرين عيال بحر البقر
إقرا وسمعنا الخبر
إفتح وفرجنا الصور
فى الصبح بعد الطابور
الجو صاحى والدنيا نور
والكل كان حيّا العلم
كل الصغار دخلوا الفصول
وكانت الحصّه إبتدت
وف لحظه كانت مجزره
كل العيال بين التُخت
صبحوا جثث متنتوره
صوت القنابل جلجلت
والأرض فجأه إتزلزلت
والدنيا نار وشعللت
تحت الحطام ضاعوا الصغار
وسط الخراب وسط الدمار
دخان غبار و لهيب و نار
لسه الأيدين ماسكه القلم
أصوات أنين وآهات ألم
ودى شنطه أهيّه
ودا سندويتش وزمزميه
ودى بنت لسّه صُغيّره
وشعورها حلوه مضفرّه
واخده أخوها فى حضنها
ودمه سايل عا التراب
بيجرى ناحية دمها
ودى أم جايّه من بعيد !
تصرخ وتبكى فين وليد ؟
قلبى ضنايا إبنى الوحيد
وبإيدها ترفع فى الحطام
وعايزه تاكل فى الحديد
وبصوت حزين تصرخ وليد
دا لسّه ابوك من كام سنه
فى الحرب برضه مات شهيد
والدم سال عالكراسات
وتُهنا ونسينا اللى فات
والقصه صبحت ذكريات
دم العيال راح ونسيتوه
ووطن الجدود هانضيّعوه
ياناس ياهوه يالاّ إلحقوه
لسه هانقول السلام
وعقد وقمة وحديث إمام
بيانات وشجب ووزير ينام
عالم ضميرهم ضاع ومات
عالم ضميرهم ضاع ومات